kya kahen ham the ki ya dida-e-tar baith gae
qulzum-e-ashk men juun lakht-e-jigar baith gae
na-tavan ham yuun tiri bazm se nikle kyunkar
kise maalum hai ham aa ke kidhar baith gae
aap ko khuun ke aansu hi rulana hoga
hal-e-dil kahne ko ham apna agar baith gae
kis ko ik dam ka bharosa hai ki manind-e-habab
bahr-e-hasti men idhar aae udhar baith gae
duur samjha hai raqibon ko yahan se ‘arif’
yaar ke paas jo be-khauf-o-khatar baith gae
Leave a Reply