dil ke sahra men koi aas ka jugnu bhi nahin
itna roya huun ki ab aankh men aansu bhi nahin
itni be-rahm na thi ziist ki dopahr kabhi
in ḳharabon men kahin saya-e-gesu bhi nahin
kasa-e-dard liye phirti hai gulshan ki hava
mere daman men tire pyaar ki ḳhushbu bhi nahin
chhin gaya meri nigahon se bhi ehsas-e-jamal
teri tasvir men pahla sa vo jaadu bhi nahin
mauj-dar-mauj tire gham ki shafaq khilti hai
mujh ko is silsila-e-rang pe qaabu bhi nahin
dil vo kam-baḳht ki dhaḌke hi chala jaata hai
ye alag baat ki tu zinat-e-pahlu bhi nahin
ye ajab rahguzar hai ki chaTanen to bahut
aur sahare ko tiri yaad ke baazu bhi nahin
hadisa ye bhi guzarta tha miri jaan ham par
paikar-e-sang hain do, main bhi nahin tu bhi nahin
Leave a Reply