Ameen Rahat Chugtai
kya bata.en kahan kahan the phuul
ḳhaak uḌti hai ab jahan the phuul
bhigi bhigi si dekh kar kaliyan
muskura.e jahan jahan the phuul
dil men gulshan khila ga.e kya kya
yuun to do din ke mehman the phuul
jab ḳhizan aa.i jaan pe khel ga.e
mahram-e-jehd-e-be-karan the phuul
jis ne toḌa usi ko ranj hua
misl-e-paimana-e-mughaan the phuul
din ki zulmat-nasib basti men
rahgiron ki kahkashan the phuul
Leave a Reply