agar ye raat hasin hai to din javan nikal
koi to rasta donon ke darmiyan nikal
ḳhuda ne joḌa banaya hai har bashar ke liye
tu is jahan se apne liye jahan nikal
na ek buund miri chhat se Tapke ai me.amar
is ehtiyat se chhat ki mire Dhalan nikal
bahut salis hai mujh ko halal kar lena
tu us ka zikr na kar aur meri jaan nikal
kisi ke vasl se kaTun nahin main us ka firaq
baghair naql ḳhuda mera imtihan nikal
tu dil men dard liye ḳhush nahin rahega sun
agar sukun tujhe chahiye to maan nikal
shanaḳht kar na sake meri mera mustaqbil
tu mere chehre se maazi ke sab nishan nikal
Leave a Reply