kuza-gar ke ghar ummiden aa.i hain
miTTi ke putle men sansen aa.i hain
ghabra kar bistar se uTh baiTha huun main
niind men phir ḳhvabon ki lashen aa.i hain
kis ne dastak di hai meri palkon par
ankhon ki dahliz pe yaden aa.i hain
ḳhvab men us ko rote dekh liya tha bas
man men jaane kya kya baten aa.i hain
ankhen surḳh dikhin to main ne puchh liya
us ka vahi bahana ankhen aa.i hain
ik takiye pe main aur meri tanha.i
aisi jaane kitni raten aa.i hain
rishton ka a.ina kab ka TuuT chuka
‘mit’ ke hisse keval kirchen aa.i hain
Leave a Reply