Kuchh to Ho Dard Ki Lazzat Hi Sahi

Pandit Jagmohan Nath Raina Shauq

kuchh to ho dard ki lazzat hi sahi

teri ulfat men aziyyat hi sahi

dard ko dard na jab tu samjhe

bad-gumani tiri aadat hi sahi

dil-e-mahjur men arman-e-visal

na sahi diid ki hasrat hi sahi

but-kada chhoḌne vaale to na the

ḳhair milti hai to jannat hi sahi

dil ko tha ḳhaak men milna so mila

dekhne valon ko ibrat hi sahi

is sitamgar ne kar li tauba

ai falak haan koi aafat hi sahi

koi jalva nazar aa.e shayad

TikTiki bandhne ki aadat hi sahi

hain kisi jalve ki ankhen mushtaq

kuchh kam-o-besh ye ghaflat hi sahi

ishq ki bolti tasvir hai ‘shauq’

dekhne valon ko hairat hi sahi