kuchh to dekhen asar charagh chale
bujh hi jaa.e magar charagh jale
muskura kar ye kis ne dekh liya
rahguzar rahguzar charagh jale
utni hi aur tirgi phaili
shahr men jis qadar charagh jale
kaun jaane ki kin amiron par
shaam se ta-sahar charagh jale
qabil-e-did hai ye aalam bhi
is taraf dil udhar charagh jale
saari basti dhuen men Duub ga.i
shahr men is qadar charagh jale
‘shauq’ andhi hai aaj zoron par
aaj har gaam par charagh jale
Leave a Reply