Tousief Tabish
kuchh ne ankhen kuchh ne chehra dekha hai
sab ne tujh ko thoḌa thoḌa dekha hai
tum par pyaas ke ma.ani khulne vaale nahin
tum ne paani pi kar dariya dekha hai
jin hathon ko chumne aa jaate the log
aaj unhin hathon men kaasa dekha hai
roti ankhen ye sun kar ḳhamosh huiin
malbe men ik shaḳhs ko zinda dekha hai
baaba bola meri qismat achchhi hai
us ne shayad haath tumhara dekha hai
lagta hai main pyaas se marne vaala huun
main ne kal shab ḳhvab men sahra dekha hai
andhi duniya ko main kaise samjha.un
in ankhon se main ne kya kya dekha hai
qaidi raat ko bhagne vaala hai ‘tabish’
us ne ḳhvab men ḳhufiya rasta dekha hai
Leave a Reply