dard ik roz koi rang dikha.e to bane
ruuh gar chhoḌ ke tan dahr men aa.e to bane
nazar aa.en tire chehre ke ḳhad-o-ḳhal tamam
dil se uTh jaa.en kabhi vahm ke saa.e to bane
vahdat-e-dard ho qariyon men hava ki manind
ek ho jaa.en agar apne para.e to bane
va.izan muzhda ki jannat men bahar aa.i hai
meri duniya se ḳhizan lauT ke jaa.e to bane
dev-e-taqdir khaḌa hai mere aage har dam
koi tadbir ise zahr pila.e to bane
jis ko dekha kisi murde ka muqallid dekha
apni ho jaa.e har ik shaḳhs ki raa.e to bane
sab ke dukh sunta huun main zo.af-e-za.ifi men vale
mera dukh koi miri maan ko suna.e to bane
apne a.amal ko auron se chhupa rakkha hai
meri niyyat ko koi mujh se chhupa.e to bane
main banata to bahut huun nahin banti lekin
vo inayat se miri baat bana.e to bane
Leave a Reply