kuchh is ada se koi dam-ba-dam lubha.e mujhe
ki harne bhi na de aur azma.e mujhe
is intizar men huun naqsh-e-ra.egan ho kar
tira karam kisi mehrab men saja.e mujhe
tire nisar kisi aise gham-gusar ko bhej
ki dil ki bhul-bhulayyon se DhunD laa.e mujhe
ye ji men hai ki sarapa vo naghma ban ja.un
ki jis ko tujh se mohabbat ho gunguna.e mujhe
kisi ki dhun men pareshan to huun bikhar hi na ja.un
gale na mauja-e-bad-e-saba laga.e mujhe
gulon se kam nahin kanTon ki sej bhi ‘ḳhurshid’
ḳhayal-e-yar agar chain se sula.e mujhe
Leave a Reply