Kuchh Is Ada Se Hamein Gham-Gusar Milte Hain

kuchh is ada se hamen gham-gusar milte hain

hazar zakhm pas-e-e’tibar milte hain

shab-e-firaq ki vahshat na puchhiye ham se

ham apne hijr se divana-var milte hain

ye shahr-e-zakhm-faroshan hai haae kya kiije

ki pa-e-gul bhi yahan khaar khaar milte hain

vo jin ki kokh men shauq-e-khirad panapta hai

vo valvale bhi junun ka shikar milte hain

saja ke rakhte hain jin ko chamak ki khvahish men

vo aaine bhi hamen dagh-dar milte hain

hamen unhi se tavaqqo hai ‘naz’ manzil ki

jo raste hamen ban kar ghubar milte hain

Leave a Comment