Kuchh Is Ada Se Aaj Wo Pahlu-Nashin Rahe

kuchh is ada se aaj vo pahlu-nashin rahe

jab tak hamare paas rahe ham nahin rahe

iman-o-kufr aur na duniya-o-din rahe

ai ishq-e-shad-bash ki tanha hamin rahe

aalam jab ek haal pe qaaem nahin rahe

kya ḳhaak e’tibar-e-nigah-e-yaqin rahe

meri zaban pe shikva-e-dard-afrin rahe

shayad mire havas thikane nahin rahe

jab tak ilahi jism men jan-e-hazin rahe

nazren miri javan rahen dil hasin rahe

ya-rab kisi ke raz-e-mohabbat ki ḳhair ho

dast-e-junun rahe na rahe astin rahe

ta-chand josh-e-ishq men dil ki hifazaten

meri bala se ab vo jununi kahin rahe

ja aur koi zabt ki duniya talash kar

ai ishq ham to ab tire qabil nahin rahe

mujh ko nahin qubul do-alam ki vusaten

qismat men ku-e-yar ki do-gaz zamin rahe

ai ishq-e-nala-kash tiri ghairat ko kya hua

hai hai araq araq vo tan-e-naznin rahe

dard-o-gham-e-firaq ke ye saḳht marhale

hairan huun main ki phir bhi tum itne hasin rahe

allah-re chashm-e-yar ki mojiz-bayaniyan

har ik ko hai guman ki muḳhatib hamin rahe

zalim utha tu parda-e-vahm-o-guman-o-fikr

kya samne vo marhala-ha-e-yaqin rahe

zat-o-sifat-e-husn ka aalam nazar men hai

mahdud-e-sajda kya mira zauq-e-jabin rahe

kis dard se kisi ne kaha aaj bazm men

achchha ye hai vo nang-e-mohabbat yahin rahe

sar-dadgan-e-ishq-o-mohabbat ki kya kami

qatil ki tegh tez ḳhuda ki zamin rahe

is ishq ki talafi-e-mafat dekhna

rone ki hasraten hain jab aansu nahin rahe

Leave a Comment