kuchh Dubta ubharta sa rahta hai samne
har lamha ik tilism-e-tamasha hai samne
uḌti hai sehn-e-dil men tahi-manzari ki ḳhaak
rangon ka ik hujum sa bikhra hai samne
bikhri hui hai dhund sar-e-shisha-e-talab
be-rang-o-nur aks-e-tamanna hai samne
zulmat-e-intishar men ankhen khuli rakho
tum jis ko DhunDte ho vo duniya hai samne
ik ḳhauf-e-be-panah hai ankhon ke ar-par
tarikiyon men Dubta lamha hai samne
ham phir bhi justuju men bhaTakte hain dar-ba-dar
halanki har qadam pe vo rahta hai samne
Leave a Reply