Kuchh Baat Rah Gai Thi Batane Ke Bawajud

kuchh baat rah gai thi batane ke bavajud

huun halat-e-safar men ghar aane ke bavajud

dil se utar chuka tha jo aa kar gale mila

duuri vahi thi dil se lagane ke bavajud

hathon men ab bhi us ki hai ḳhushbu basi hui

jo rah gai thi haath chhuḌane ke bavajud

purze vo ḳhat ke aaj bhi rakkhe hain mere paas

jo bach gae the ḳhat ko jalane ke bavajud

naam us ka mere dil pe chhapa is tarah se hai

yuun naqsh hai abhi bhi miTane ke bavajud

mujh ko bhi ye kamal-e-hunar hai mila hua

main ji rahi huun us ko bhulane ke bavajud

koi bhi ham-shanas nahin ham-nava nahin

rishton men ik ḳhala hai nibhane ke bavajud

teri sadaen aaiin jo maazi ki samt se

ham ruk gae hain paanv baḌhane ke bavajud

jo zid men baḌh gae the zaminon ko raund kar

ḳhush kyon nahin hain asman paane ke bavajud

ye kaisa intizar ki hota nahin hai ḳhatm

tu aa gaya magar tire aane ke bavajud

Leave a Comment