Kuchh Ajab Ye Bargah-e-Ishq Ka dastur Hai

Sufi

kuchh ajab ye bargah-e-ishq ka dastur hai

jitna jo mukhtar hai utna hi vo majbur hai

maut par qudrat hai jiine ka nahin maqdur hai

tu hi dard-e-dil bata ab kya tujhe manzur hai

ho ke mukhtar ikhtiyar-e-khair-o-shar se duur hai

itni qudrat par bhi insan kis qadar majbur hai

kitna pur-hairat hai manzar astan-e-yar ka

duur se nazdik-tar nazdik se phir duur hai

lazzat-e-zauq-e-asiri hai asiri ka sabab

varna chahen to qafas se ashiyan kya duur hai

gum hua huun shauq-e-manzil men kuchh is andaz se

ye nahin maalum manzil mujh se kitni duur hai

vo tasavvur se na jaaen jaan jaae yaar hai

mujh ko ye bhi be-khudi-e-ishq men manzur hai

ek vo hain jin ki tufan men hai sahil par nazar

dubne vaale ko sahil se bhi sahil duur hai

kis se ho ‘afqar’ umid-e-charasazi dahr men

jo bhi is duniya men hai majbur hai majbur hai