Azhar Adeeb
kuchh ab ke rasm-e-jahan ke ḳhilaf karna hai
shikast de ke adu ko maaf karna hai
hava ko zid ki uḌa.egi dhuul har surat
hamen ye dhun hai ki a.ina saaf karna hai
vo bolta hai to sab log aise sunte hain
ki jaise us ne koi inkishaf karna hai
mujhe pata hai ki apne bayan se us ne
kahan kahan pe abhi inhiraf karna hai
charagh le ke hatheli pe ghumna aise
hava-e-tund ko apne ḳhilaf karna hai
vo jurm ham se jo sarzad nahin hue ‘az.har’
abhi to un ka hamen e’tiraf karna hai
Leave a Reply