ku-e-janan men nahin koi guzar ki surat
dil uḌa phirta hai TuuTe hue par ki surat
ham to manzil ke talabgar the lekin manzil
aage baḌhti hi ga.i rahguzar ki surat
vo rahen samne mere to tasalli varna
dil bhi kambaḳht bhaTakta hai nazar ki surat
ruuh afsurda pareshan ḳhayalat men gum
aisi pahle kabhi dekhi thi bashar ki surat
meri qismat men mohabbat ne yahi likkha hai
dard bhi dil men rahe zaḳhm-e-jigar ki surat
baiTh jaa.en kisi goshe men simaT kar ai dost
kaun gardish men rahe shams-o-qamar ki surat
vo ga.e ghar se to phir ham ne bhi ghar ko chhoḌa
ham se dekhi ga.i divar na dar ki surat
chand aansu hi mire dil pe ‘falak’ gir jaa.en
atish-e-gham se sulagta hai sharar ki surat
Leave a Reply