Muzaffar Ahmad Muzaffar
koi mahrum-e-mohabbat na raha mere ba.ad
rang laa.i miri tasir-e-dua mere ba.ad
aaj iisa ki tarah daar pe khinche hai mujhe
mujh pe ro.egi ye maḳhluq-e-ḳhuda mere ba.ad
mere miTne se hue goya qafas se azad
na raha koi giraftar-e-bala mere ba.ad
aisi ruThi hai mashiyyat se tiri rabb-e-karim
phir chaman men na ga.i bad-e-saba mere ba.ad
fatiha ke liye aaya tha vo hamrah raqib
ḳhuub di us ne mohabbat ki saza mere ba.ad
sub.h-dam aati hai is soḳhta-samani men
baagh se nala-e-bulbul ki sada mere ba.ad
meri janib se koi ja ke kahe majnun se
ḳhak-e-sahra-e-tamanna na uḌa mere ba.ad
us ne ahbab se puchha hai mire ghar ka pata
yaad aaya use paiman-e-vafa mere ba.ad
vo jo likkha tha kabhi ḳhun-e-jigar se main ne
miTta jaata hai vahi naqsh-e-vafa mere ba.ad
tujh pe ilzam-e-mohabbat na laga de duniya
aa ke turbat pe yuun aansu na baha mere ba.ad
ranj to ye hai ‘muzaffar’ ki vo paiman-shikan
lab pe laaya na kabhi harf-e-dua mere ba.ad
Leave a Reply