Wafa Naqvi
bas yahi baat yahan harf-e-malamat ki hai
main ne dariya ki nahin dasht ki bai.at ki hai
qatl suraj ko kiya vo bhi chhupa kar ḳhanjar
shaam valon ne sahar men ye siyasat ki hai
varna kya ham ko gharaz haal tumhara puchhen
baat ye kuchh bhi nahin sirf mohabbat ki hai
ham to maujon se laḌe aur kinare pahunche
ham ne kab Dubti kashti ki himayat ki hai
abhi dalan men utre nahin shab ke saa.e
jaane vaale ne suna ye hai ki ujlat ki hai
ab andhere hi andhere hain gali-kuchon men
chand-taron ne mire shahr se hijrat ki hai
ye alag baat ki alfaz hain ab bhi raushan
tere ḳhanjar ne to is baar bhi jur.at ki hai
ab use DhunDne nikli hain barahna yaden
jis ne kaghaz ke libason ki tijarat ki hai
mere honTon pe ḳhamoshi ke paḌe hain taale
meri ankhon ne miri aaj bhi shohrat ki hai
Leave a Reply