Koi Kaisa Hi Sabit Ho Tabiat Aa Hi Jati Hai

koī kaisā hī sābit ho tabī.at aa hī jaatī hai

ḳhudā jaane ye kyā aafat hai aafat aa hī jaatī hai

vo kaise hī chaleñ tham tham qayāmat aa hī jaatī hai

bache koī kisī Dhab se pa shāmat aa hī jaatī hai

sitam kar ke sitam-gar kī nazar nīchī hī rahtī hai

burā.ī phir burā.ī hai nadāmat aa hī jaatī hai

zuleḳhā be-ḳhirad āvāra lailā bad-maza shīrīñ

sabhī majbūr haiñ dil se mohabbat aa hī jaatī hai

charāġh-o-sham.a bazm-e-yār kar kar ġhair ko phūñkā

dil-e-afsurda meñ āḳhir harārat aa hī jaatī hai

huā nazroñ hī nazroñ meñ vo mahshar barq-e-sad-ḳhirman

mohabbat kī nigāhoñ se sharārat aa hī jaatī hai

pasīna aa gayā un ko kiyā va.ada jo aane kā

burī hai naaz bardārī nazākat aa hī jaatī hai

har ik se ab vo kahte haiñ ki lo ham par ye marte haiñ

jiyeñge is tarah kab tak ki ġhairat aa hī jaatī hai

nahīñ kuchh dil kā phirnā ahd-e-dushman se tirā phirnā

magar kuchh soch kar āḳhir muravvat aa hī jaatī hai

na hotī gar naved-e-marg kyuuñ kar hijr meñ jiite

mohabbat meñ bhī āsā.ish pe niyyat aa hī jaatī hai

visāl-e-ġhair ke qisse ko sun kar kyā taḌaptā huuñ

ye armāñ koī jā saktā hai hasrat aa hī jaatī hai

agar sad-sāl kiije shukr-e-ulfat kījiye lekin

ye vo sheva hai bad-zan phir shikāyat aa hī jaatī hai

‘qalaq’ ḳhat ġhair kā kyuuñ kar na aatā kyuuñ na tum paḌhte

qazā likhī huī hazrat-salāmat aa hī jaatī hai

Leave a Comment