koi kaisa hi sabit ho tabi.at aa hi jaati hai
ḳhuda jaane ye kya aafat hai aafat aa hi jaati hai
vo kaise hi chalen tham tham qayamat aa hi jaati hai
bache koi kisi Dhab se pa shamat aa hi jaati hai
sitam kar ke sitam-gar ki nazar nichi hi rahti hai
bura.i phir bura.i hai nadamat aa hi jaati hai
zuleḳha be-ḳhirad avara laila bad-maza shirin
sabhi majbur hain dil se mohabbat aa hi jaati hai
charagh-o-sham.a bazm-e-yar kar kar ghair ko phunka
dil-e-afsurda men aḳhir hararat aa hi jaati hai
hua nazron hi nazron men vo mahshar barq-e-sad-ḳhirman
mohabbat ki nigahon se shararat aa hi jaati hai
pasina aa gaya un ko kiya va.ada jo aane ka
buri hai naaz bardari nazakat aa hi jaati hai
har ik se ab vo kahte hain ki lo ham par ye marte hain
jiyenge is tarah kab tak ki ghairat aa hi jaati hai
nahin kuchh dil ka phirna ahd-e-dushman se tira phirna
magar kuchh soch kar aḳhir muravvat aa hi jaati hai
na hoti gar naved-e-marg kyuun kar hijr men jiite
mohabbat men bhi asa.ish pe niyyat aa hi jaati hai
visal-e-ghair ke qisse ko sun kar kya taḌapta huun
ye arman koi ja sakta hai hasrat aa hi jaati hai
agar sad-sal kiije shukr-e-ulfat kijiye lekin
ye vo sheva hai bad-zan phir shikayat aa hi jaati hai
‘qalaq’ ḳhat ghair ka kyuun kar na aata kyuun na tum paḌhte
qaza likhi hui hazrat-salamat aa hi jaati hai
Leave a Reply