koi batla.e ki ye turfa tamasha kyuun hai
aadmi bhiiḌ men rahte hue tanha kyuun hai
paanv phaila.e hue gham ka andhera kyuun hai
aa ga.i sub.h-e-tamanna to phir aisa kyuun hai
main to ik zarra-e-nachiz huun aur kuchh bhi nahin
vo jo suraj hai mire naam se jalta kyuun hai
tujh ko nisbat hai agar nam-e-barahim se kuchh
aag ko phuul samajh aag se Darta kyuun hai
kaun sa ahd hai jis ahd men ham jiite hain
dasht to dasht hai dariya yahan pyasa kyuun hai
pi ke bahkega to rusva.i-e-mahfil hogi
vo jo kam-zarf hai maiḳhane men aaya kyuun hai
koi aaseb hai ya sirf nigahon ka fareb
ek saaya mujhe har su nazar aata kyuun hai
yaad kis ki mah-o-ḳhurshid liye aa.i hai
shab-e-tarik men aaj itna ujala kyuun hai
bad-havasi ka ye aalam kabhi pahle to na tha
hashr se pahle hi ye hashr sa barpa kyuun hai
Leave a Reply