Kiya Gardishon Ke Hawale Use Chaak Par Rakh Diya

kiya gardishon ke havale use chaak par rakh diya

ki banne bigaḌne ka har faisla ḳhaak par rakh diya

mujhe qasr-e-ta.abir ki us ne sab kunjiyan saunp diin

magar chhin kar ḳhvab ankhon se aflak par rakh diya

siva raakh hone ke ab koi chara bacha hi nahin

sharar-e-havas kis ne ye mere ḳhashak par rakh diya

koi hai jo girdab-e-gham se bacha.e hue hai mujhe

ki ik mehrban haath phir chashm-e-namnak par rakh diya

koi kaam ‘aslam’ bana hi nahin vahshaton ke baghair

jala kar charagh-e-junun taq-e-idrak par rakh diya