kitnon ne jaan vaar di hirni si chaal par
kitne hi log mar miTe us ḳhush-ḳhisal par
mujh ko ḳhabar mili hai ki pariyon ke des men
hote hain roz tabsire us ke jamal par
main bhi saval puchh ke ḳhamosh ho gaya
us ne bhi chup hi saadh li mere saval par
bhanvra kisi gulab ko chhuta hai jis tarah
rakhta huun apne honT yuun dilbar ke gaal par
kis ke zara se zikr pe sansen mahak uThin
chehre ke rang khil uThe kis ke ḳhayal par
paḌhte hain log aaj bhi ulfat ki dastan
likhte hain log aaj bhi hijr-o-visal par
chhani hain us ne ja-ba-ja sahra ki pastiyan
pahuncha hai ishq phir kahin auj-e-kamal par
haara huun is dileri se laḌta hua ‘zaki’
dushman bhi pur-malal hai mere zaval par
Leave a Reply