Navin C Chaturvedi
kitni baar bata.un tujh ko kaisa lagta hai
tujh se milna baten karna achchha lagta hai
nthuni se uupar palkon se niche ghunghaT rakh
mujh ko aadha chand bahut hi pyara lagta hai
sadiyon se hai yuun hi tar-o-taza aur ḳhushbu-dar
kaise kah duun ishq gulabon jaisa lagta hai
aansu ka qatra khara hi hota hai lekin
tujh ko dekh kar chhalke hai to miTha lagta hai
kahan tira apna-pan aur kahan mere ehsan
parbat ho kar bhi mera qad bauna lagta hai
ab bhi dil valon ki bazmen sajti hain lekin
pahle mele lagte the ab majma.a lagta hai
Leave a Reply