Tauseef Tabassum
kitne hi tiir ḳham-e-dast-o-kaman men honge
jin ke sofar abhi se miri jaan men honge
dil hai ab ḳhana-e-aseb-zada ki surat
zaḳhm rauzan isi tarik makan men honge
ek ham hi nahin sar men liye sauda-e-vafa
aur bhi kitne mohabbat ke guman men honge
sirf tere lab-o-ruḳh ki nahin tasvir-e-chaman
mere bhi gham ke ka.i rang ḳhizan men honge
laḌkhaḌata hua aaya hai mizha tak aansu
raste kaise dil-e-dard-nishan men honge
bar-mahal hai tah-e-ashjar hava ka nauha
kal ke ghunche bhi isi dasht-e-ziyan men honge
hai ḳhad-o-ḳhal ka ambar yahan har chehra
ham vo honge jo na ḳhud apne guman men honge
Leave a Reply