Shakeel Jamali
kitne aḳhbar-faroshon ko sahafi likkha
na-mukammal ko bhi ḳhadim ne izafi likkha
tu ne bhule se na samjhi mire jazbe ki kasak
main ne barson tiri ankhon ko ghilafi likkha
haath uTha sakte the mere bhi baghavat ka alam
main ne har zulm ke ḳhane main muafi likkha
ishq ki ḳhair ho allah ki na-shukron ne
ik adhuri si mulaqat ko kaafi likkha
aap duniya ko samajhte rahen saman-e-tarab
main ne sanson ko gunahon ki talafi likkha
vo hi karta raha andar se malamat mujh ko
main ne jo lafz usulon ke munafi likkha
bevaqufon ne miri abla-pa.i ka ilaaj
hansi aati hai ki hamdard ki saafi likkha
Leave a Reply