Liaqat Jafri
kitna dushvar hai jazbon ki tijarat karna
ek hi shaḳhs se do baar mohabbat karna
jis ko tum chaho koi aur na chahe us ko
is ko kahte hain mohabbat men siyasat karna
surma.i aankh hasin jism gulabi chehra
is ko kahte hain kitabat pe kitabat karna
dil ki taḳhti pe bhi ayat likhi rahti hain
vaqt mil jaa.e to un ki bhi tilavat karna
dekh lena baḌi taskin milegi tum ko
ḳhud se ik roz kabhi apni shikayat karna
jis men kuchh qabren hon kuchh chehre hon kuchh yaden hon
kitna dushvar hai us shahr se hijrat karna
Leave a Reply