kisi tarah ḳhalish-e-arzu miTa na sake
tire qarib bhi aa kar sukun pa na sake
chaman men dekhe koi us kali ki mahrumi
jo muskura.e to ji bhar ke muskura na sake
usi ka sajda usi ka niyaz usi ki namaz
jo us ke dar pe jhuka kar jabin uTha na sake
jahan-e-ishq men hai inqalab ki zamin
vo ek aah jo dil se labon tak aa na sake
na puchh us ke muqaddar ki na-rasa.i ko
jo aap gum ho magar phir bhi tujh ko pa na sake
ye raaz vo hai jo honTon tak aa nahin sakta
kahan jhuka.i jabin aur kahan jhuka na sake
kisi ke gham ka raha paas is qadar ‘shariq’
ki bhuul kar bhi mohabbat men muskura na sake
Leave a Reply