kisi se laḌaen nazar aur jhelen mohabbat ke gham itni fursat kahan
uThaen kisi mah-paikar hasina ke jaur-o-sitam itni fursat kahan
zamane ki be-rahmiyon ke tasadduq dimagh-e-nashat-o-alam hi nahin
dil apna kare arzu-e-jafa ya umid-e-karam itni fursat kahan
dubo den mai-e-nab ki mastiyon men falakat ke nakbat ke ehsas ko
bana len kisi amiyana se kuuze hi ko jam-e-jam itni fursat kahan
hon azad-e-afkar lekin tafakkur men duube hue se rahen raat din
tabi.at ki be-vaj.h afsurdagi ke maze luTen ham itni fursat kahan
na maazi hamara na mustaqbil apna kuchh is taur se harf-e-imroz hain
gham-e-dosh ya fikr-e-farda men ‘aḳhtar’ karen sar ko ḳham itni fursat kahan
Leave a Reply