kisi kisi ko hi aate hain raas afsane
hamen to karte hain aksar udaas afsane
na.e zamane ke in men ka.i ishare hain
bahut purane hain go mere paas afsane
ḳhushi ke vaste jis ne gale lagaya unhen
usi ko chhoḌ ga.e mahv-e-yas afsane
jinhen shu.ur se aari qarar dete the
vahi bane hain qayafa-shanas afsane
libas vaale bhi paḌhte hain in ko chhup-chhup kar
jo main ne likhe hain kuchh be-libas afsane
vo ek pyase ne ḳhun-e-jigar se likhe hain
jo ban ga.e hain samundar ki pyaas afsane
vo ek pyase ne ḳhun-e-jigar se likhe hain
jo ban ga.e hain samundar ki pyaas afsane
ḳhayal-o-ḳhvab ke qisse nahin hain in men ‘asad’
hain ahd-e-nau ke haqiqat-shanas afsane
Leave a Reply