kise ḳhabar thi ki jiite ji bhi vo daur aye.ga zindagi ka
ki hoga mahsus har nafas ye na koi mera na main kisi ka
hudud-e-vahm-o-guman se guzra makan to kya la-makan se guzra
rukega aḳhir kahan pahunch kar ye karvan zauq-e-agahi ka
jo mere dil se tha un ko karna na kar sakin aap ki nigahen
miri tabi.at men naqs jo hai qusur hai vo bhi aap hi ka
hai qabil-e-rahm un ki halat na kijiye aap un se nafrat
dar-asl ehsas-e-kamtari hai jinhen hai kuchh naaz bartari ka
sikhane vaale to aa.e paiham har ik zamin par har ik zaman men
magar ham aise hi bad-guhar the saliqa aaya na zindagi ka
ye ham ne maana ki is jahan men ḳhulus-e-jins-e-garan hai lekin
kabhi to yaaro ḳhulus barto bharam to rah jaa.e dosti ka
jo husn-e-pur-kar par fida hain unhen ‘raza’ kaun ye bata.e
vo husn hai fitna-e-qayamat laga.e ghaza jo sadgi ka
Leave a Reply