Sarfraz Nawaz
kise ḳhabar thi ki is ko bhi TuuT jaana tha
hamara aap se rishta bahut purana tha
ham apne shahr se ho kar udaas aa.e the
tumhare shahr se ho kar udaas jaana tha
sada laga.i magar koi bhi nahin palTa
har ek shaḳhs na jaane kahan ravana tha
yuun chup hua ki phir anhken hi DabDaba uTThin
na jaane us ko abhi aur kya batana tha
kise paḌi thi mira haal puchhta mujh se
mujhe to rasm nibhani thi muskurana tha
bhanak na jaane ye kaise lagi havaon ko
ki mujh ko rahguzar par diya jalana tha
chhupi thi is men hi tamhid bhi juda.i ki
hamara aap se milna to ik bahana tha
tujhe ḳhabar hi nahin mere jitne vaale
tire liye to hamesha hi haar jaana tha
nigah-e-shauq se yuun ghair ko tira takna
‘navaz’ aur nahin kuchh mujhe satana tha
Leave a Reply