Saleem Fauz
dushvar yuun bhi naql-e-makani paḌi mujhe
raste hi se bisat uThani paḌi mujhe
kuchh din to us ke dil pe raha hukmaran magar
ye saltanat bhi chhoḌ ke jaani paḌi mujhe
us ne kaha ki kaise bikharta hai aadmi
muTThi men bhar ke ḳhaak uḌani paḌi mujhe
ik shaḳhs muskura ke mujhe dekhne laga
bas aa.ine se gard haTani paḌi mujhe
tum ko to dhaḌkanon men basa.e hue hai dil
tum ko bhi dil ki baat batani paḌi mujhe
us ka ishara tark-e-marasim ka tha ‘salim’
ruḳhsat ke vaqt aankh jhukani paḌi mujhe
Leave a Reply