kise jaana kahan hai munhasir hota hai is par bhi
bhaTakta hai koi bahar to koi ghar ke bhitar bhi
kisi ko aas badal se koi dariyaon ka talib
agar hai tishna-lab sahra to pyasa hai samundar bhi
shikasta ḳhvab ki kirchen paḌi hain aankh men shayad
nazar men chubhta hai jab tab adhura sa vo manzar bhi
suragh is se hi lag jaae mire hone na hone ka
guzar kar dekh hi leta huun apne men se ho kar bhi
jise parchhain samjhe the haqiqat men na paikar ho
parakhna chahiye tha aap ko us shai ko chhu kar bhi
palaT kar muddaton ba.ad apni tahriron se guzrun to
lage aksar ki ho sakta tha is se aur behtar bhi
Leave a Reply