Kis Ki Sada Pe Kan Lagae Hue Hun Main

Poet

kis ki sada pe kaan laga.e hue huun main

zaanu pe apne sar ko jhuka.e hue huun main

vo din ga.e ki yaad thi aThon pahar tiri

ab apne aap ko bhi bhula.e hue huun main

rangin dikha.i deta hai saara jahan mujhe

ankhon men un ke jalve basa.e hue huun main

maane hai tere aane men ai mast-e-naz kya

milne ki kab se aas laga.e hue huun main

‘sa.ib’ firaq-e-yad men ho maut hi nasib

har vaqt kaisa haal bana.e hue huun main