Poet
kis ke sapnon se miri niind saji rahti hai
jagta huun to in ankhon men nami rahti hai
DhunDhta rahta huun be-sudh main kisi machis ko
ek cigarette mire honTon se lagi rahti hai
ek tasvir saliqe se rakhi hai ghar men
baaqi har chiiz to bas yuun hi paḌi rahti hai
aise aalam men jahan koi nahin kahta kuchh
ye sadaon ki faza kaise bani rahti hai
Dhalta jaata huun andheron men main rafta-rafta
chandni duur kahin duur khaḌi rahti hai
main tire paas ḳhalaon men pahunch jaata huun
aur ik laash kahin ghar men paḌi rahti hai
Leave a Reply