poet

Kis Ke Hathon Bik Gaya Kis Ke Kharidaron Mein Hun

kis ke hathon bik gaya kis ke kharidaron men huun

kya hai kyuun mashhur main saudai bazaron men huun

gham nahin jo bediyan pahne giraftaron men huun

naaz hai is par ki tere naz-bardaron men huun

tere kuche men jo mera khuun ho ai lala-ru

surkh-ru yaron men huun gul-rang gulzaron men huun

is qadar hai ai pari-ru zor par josh-e-junun

sar se todun qaid agar lohe ki divaron men huun

ishq se matlab na tha dil zulf men uljha na tha

tha jab azadon men tha ab to giraftaron men huun

hogi mashuqon ko khvahish mujh nahif-o-zar ki

gul karenge aarzu meri main un kharon men huun

dil ko dhamkana hai dhyan us nargis-e-bimar ka

jaan le kar chhodta huun main un azaron men huun

us mire saude ka duniya men thikana hai kahin

jaan ka gahak jo hai us ke kharidaron men huun

kis se puchhun kya karun sayyad ki marzi ki baat

taaza varid huun qafas men to giraftaron men huun

aarzu hai main vo gul ho jaun ai rashk-e-chaman

baagh men din bhar rahun shab ko tire haron men huun

aa gaya dam ziiq men lekin na ye sabit hua

kaun hai iisa mira main kis ke bimaron men huun

Dariye aisi aankh se jo saaf ishare se kahe

nargis-e-bimar huun par mardum-azaron men huun

dil to main sadqa karun tum us pe meri jaan lo

tum hi munsif ho ki main aise gunahgaron men huun

kaun huun kya huun kahan huun main nahin ye bhi khabar

khud-ghalat khud-rafta huun main khaak hoshyaron men huun

hai ye abru ka ishara thi jahan ki zul-fiqar

ai ‘sharaf’ main us sulah-khani ki talvaron men huun

More Poems

Leave a Comment