Mahtab Haider Naqvi
kin bastiyon ke yaaro ham ḳhvab dekhte hain
jangal pahaḌ dariya talab dekhte hain
begani lag rahin hain mausam ki barishen bhi
mahtab suraton ko be-ab dekhte hain
sach mai men jhuuT paani itna mila diya hai
ab jis ko dekhte hain sairab dekhte hain
ik zulf ke bhanvar se jaise nikal ke aa.e
ik jism ki nadi men girdab dekhte hain
kal jis jagah paḌa tha paani ka kaal ham par
aaj us jagah lahu ka sailab dekhte hain
ai be-hunar sambhal kar chalna hai sha.iri men
sher-o-suḳhan ke mahir ahbab dekhte hain
Leave a Reply