ḳhvahishon ki badshahi kuchh nahin
dil men shauq-e-kaj-kulahi kuchh nahin
kyuun adalat ko shavahid chahiyen
kya ye zaḳhmon ki gavahi kuchh nahin
sub.h likkhi hai agar taqdir men
raat ki phir ye siyahi kuchh nahin
soch apni zaat tak mahdud hai
zehn ki kya ye tabahi kuchh nahin
zarf shamil hai hamare ḳhuun men
ye tumhari kam-nigahi kuchh nahin
hans ke milta hai umuman vo ‘azim’
is tarah jaise hua hi kuchh nahin
Leave a Reply