KHwabon Ki Tabir Bana Kar Dekhun To

ḳhvāboñ kī ta.abīr banā kar dekhūñ to

maiñ terī tasvīr banā kar dekhūñ to

ik qaidī ko karvaT lenā mushkil hai

phūloñ se zanjīr banā kar dekhūñ to

ik vīrān sā rasta ho aur shaam Dhale

us par ik rahgīr banā kar dekhūñ to

duniyā tujh par qabza karne aatī hai

maiñ tujh ko jāgīr banā kar dekhūñ to

kāġhaz kī kashtī meñ dariyā paar karūñ

tinkoñ se shahtīr banā kar dekhūñ to

is qirtās pe ashkoñ kā har rang khile

tasvīreñ dil-gīr banā kar dekhūñ to

bachche hoñ sahrā ho aur mashkīza ho

is meñ phir ik tiir banā kar dekhūñ to

‘shā.ista’ ik baar phir apne malbe se

sūrat-e-yak-ta.amīr banā kar dekhūñ to

Leave a Comment