ḳhvabon ki ta.abir bana kar dekhun to
main teri tasvir bana kar dekhun to
ik qaidi ko karvaT lena mushkil hai
phulon se zanjir bana kar dekhun to
ik viran sa rasta ho aur shaam Dhale
us par ik rahgir bana kar dekhun to
duniya tujh par qabza karne aati hai
main tujh ko jagir bana kar dekhun to
kaghaz ki kashti men dariya paar karun
tinkon se shahtir bana kar dekhun to
is qirtas pe ashkon ka har rang khile
tasviren dil-gir bana kar dekhun to
bachche hon sahra ho aur mashkiza ho
is men phir ik tiir bana kar dekhun to
‘sha.ista’ ik baar phir apne malbe se
surat-e-yak-ta.amir bana kar dekhun to
Leave a Reply