KHwabon Ke Sanam-KHane Jab Dhae Gae Honge

Ezaz Afzal

ḳhvabon ke sanam-ḳhane jab Dhaa.e ga.e honge

us daur ke sab aazar bulva.e ga.e honge

tu bhi na bachi hogi ai afiyat-andeshi

har samt se jab patthar barsa.e ga.e honge

phir us ne masa.il ka hal DhunD liya hoga

phir log masa.il men uljha.e ga.e honge

ham guzre ki tum guzre ye dekhne kaun aata

the jitne tamasha.i sab laa.e ga.e honge

yaran-e-qadah se kuchh laghzish bhi hui hogi

danista bhi kuchh saghar chhalka.e ga.e honge

‘afzal’ ka muqaddar hai haq-goi-o-rusva.i

sach baat kahi hogi jhuTla.e ga.e honge