Yasmin Husaini Zaidi Nikhat
ḳhvab palkon pe miri aa ke machal jaate hain
ya kabhi ban ke guhar aankh se Dhal jaate hain
mujh ko gosha koi manus sa jo lagta hai
log divar pe tasvir badal jaate hain
kal vo aalam tha ki ik jaan thi do qalib the
aaj ye hai ki vo katra ke nikal jaate hain
ham ko tufan-e-havadis ka koi ḳhauf nahin
ye jo aate hain to kuchh ham bhi bahal jaate hain
apne angan men vo suraj ke tamanna.i hain
jo diya dekh ke hamsa.e ka jal jaate hain
main suḳhnavar bhi nahin fan ka saliqa bhi nahin
zaḳhm hain dil ke jo naghmat men Dhal jaate hain
Leave a Reply