ḳhushk ankhon se koi pyaas na joḌi ham ne
aas ham se jo sharabon ko thi toḌi ham ne
barha ham ko mila apne lahu men vo sharar
apni dukhti hui rag jab bhi nichoḌi ham ne
jo sanvarne ko kisi taur bhi raazi na hui
bhaaḌ men phenk di duniya vo nigoḌi ham ne
is tarah ham ne samundar ko pilaya paani
apni kashti kisi sahil pe na moḌi ham ne
jab koi chand mila daagh na dekhe us ke
aankh suraj se mila kar na sikoḌi ham ne
gard ghairat ke badan par jo nazar aa.i kabhi
der tak apni ana ḳhuub jhinjhoḌi ham ne
Leave a Reply