ḳhush-fahmiyon ke khel ki ab kya sabil hai
kaghaz ki ek naav hai aur ḳhushk jhiil hai
sar par uTha.e dhuup ko suraj ki tarah chal
manzil kahan ye silsila-e-sang-mil hai
lashon ke Dher men abhi zinda to huun magar
mere bhi sar pe uḌti hui ek chiil hai
saaya bhi band muTThi men rakhta hai bhinch kar
uncha sa ye daraḳht nihayat baḳhil hai
main ghaav gahre paniyon ka huun na mujh se mil
tu mujh men Duub ja.egi nannhi si jhiil hai
darvaze khiḌki mujh pe ‘musavvir’ hain sab hi band
sarma ka ThiThura chand hai aur shab tavil hai
Leave a Reply