Saleem Shahid
khulti hai guftugu se girah pech-o-tab ki
par kis se khul ke baat karen iztirab ki
kaafi nahin hai chashm-e-tamasha ko rang-e-gul
laa.en kahan se zaḳhm men ḳhushbu gulab ki
apni barahnagi ko bacha tez dhuup se
kirnon men bu hai jalte hue aftab ki
kuchh main shajar se TuuT ke be-ḳhanuman hua
haan kuchh hava ne bhi miri miTTi ḳharab ki
ik umr ho ga.i hai ki main jankani men huun
aisi Thahar ga.i hai ye saa.at azaab ki
ehsas-e-tirgi hai to suraj uchhal de
varna dua na maang yahan inqilab ki
mahkum bastiyon se sarakne lagi hai dhuup
vo ahd huun ki jis ne shafaq be-naqab ki
bijli chali ga.i to vo ankhon men rah gaya
ab chhu ke paḌh raha huun ibarat kitab ki
‘shahid’ kahan se ho ke guzarti hai ab-ju
rangat tamam surḳh hai kyuun sat.h-e-ab ki
Leave a Reply