Faza Ibn E Faizi
khula na mujh se tabi.at ka tha bahut gahra
hazar us se raha rabta bahut gahra
bas is qadar ki ye hijrat ki umr kaT jaa.e
na mujh gharib se rakh silsila bahut gahra
sab apne a.ine us ne mujhi ko saunp diye
use shikast ka ehsas tha bahut gahra
mujhe tilism samajhta tha vo sarabon ka
baḌha jo aage samundar mila bahut gahra
shadid pyaas ke aalam men Dubne se bacha
qadah to kya mujhe qatra laga bahut gahra
tu us ki zad men jo aaya to Duub ja.ega
ba-qadr-e-ab hai har aa.ina bahut gahra
milenge raah men tujh ko charagh jalte hue
kahin kahin hai mira naqsh-e-pa bahut gahra
talash-e-ma.ani-e-maqsud itni sahl na thi
main lafz lafz utarta gaya bahut gahra
jo baat jan-e-suḳhan thi vahi rahi ojhal
liya to us ne mira ja.eza bahut gahra
qadim hote hue mujh se bhi jadid hai vo
asar hai us pe mire daur ka bahut gahra
‘faza’ hamen to hai kaafi yahi ḳhumar-e-vajud
hai be-sharab bhi hasil nasha bahut gahra
Leave a Reply