Arshad Mahmood Arshad
ḳhudi ke zo.am men aisa vo mubtala hua hai
jo aadmi bhi nahin tha vo ab ḳhuda hua hai
vo kah raha tha bujha.ega pyaas sahra ki
mira ik abr ke TukḌe se rabta hua hai
tumhara tarz-e-bayan ḳhuub hai magar sahab
ye qissa main ne zara muḳhtalif suna hua hai
ye miTTi paanv mire chhoḌti nahin varna
falak ka rasta bhi samne paḌa hua hai
usi ke haath pe bai.at main kar ke aaya huun
jo buḌha peḌ kaḌi dhuup men khaḌa hua hai
ḳhiraj mangta hai mujh se ye badan mera
ki lauh-e-dil pe tira naam bhi likha hua hai
vo mujh ko dekh ke rasta badal gaya ‘arshad’
zara si der men us ko ye jaane kya hua hai
Leave a Reply