Khudaya Hind Ka Raushan Charagh-E-Arzu Kar De

khudaya hind ka raushan charagh-e-arzu kar de

yad-e-qudrat se is ko bagh-e-jannat hu-ba-hu kar de

shamim-e-lutf se khak-e-vatan ko mushkbu kar de

hara abr-e-karam se is ka nakhl-e-arzu kar de

hamare dagh-e-isyan ki khudaya shust-o-shu kar de

farishta surat-e-insan men ham ko hu-ba-hu kar de

sitara hind ka chamke siyah-bakhti mite yarab

jo qaumen is men pisti hain unhen to sulh-ju kar de

nahin yaara hai mujh ko raz-e-dil izhar karne ka

ata taqat zaban ko ab bara-e-guftugu kar de

yahi hai aarzu apni yahi hai muddaa apna

jo ahl-e-hind hain yarab unhen to surkh-ru kar de

ada dil se karenge shukr sab ahl-e-vatan yarab

mai-e-ishrat se jo un ka liya lab to subu kar de

tiri chutki men rishta hai tiri chutki men sozan hai

khudaya hind ke chak-e-gareban ko rafu kar de

adab se ‘barq’ ki har-dam yahi tujh se guzarish hai

hamare mulk ko saare jahan men nam-ju kar de

Leave a Comment