Poet
ghazva-e-khandaq ka safar
zaban ki khandaq tak aa pahuncha
lekin sazishen hathiyai nahin ja sakin
iblis ki maayyat men
namaz-e-hajat ada karne vaale
hatheliyon men jannat bhar ke kahte hain
khudaya
ye duudh aur shahd ki nahren
kis ke liye bacha rakhi hain
teri zamin pe to ab
kachre ke dher se
rizq nahin insani khilaune milte hain
zalimon ne mushken kas liin
aur teri daraz rassiyon ne
hazaron iisa maslub kar diye
teri tevri men bal padta hai to
zamin taish men thuthni hilati hai
aur asman saari raat
us pe bhunkta rahta hai
dekh tere khilaunon ki
zaban-darazi badh gai hai
aur likhne valon ke liye
saari kahaniyan
baasi kadhi ke ubaal jaisi ho gai hain
is liye surkhiyon men ab
teri masrufiyat pe saval uthaya ja raha hai
tu chup-chap mitti ko
khanakte hue sunta hai
kabhi bol ke bhi dekh
Leave a Reply