KHuda Jaane Kahan Hai Asghar-E-Diwana Barson Se

Asghar Gondvi

ḳhuda jaane kahan hai ‘asghar’-e-divana barson se

ki us ko DhunDhte hain kaaba o but-ḳhana barson se

taḌapna hai na jalna hai na jal kar ḳhaak hona hai

ye kyuun soi hui hai fitrat-e-parvana barson se

koi aisa nahin ya rab ki jo is dard ko samjhe

nahin malum kyuun ḳhamosh hai divana barson se

kabhi soz-e-tajalli se use nisbat na thi goya

paḌi hai is tarah ḳhakistar-e-parvana barson se

tire qurban saaqi ab vo mauj-e-zindagi kaisi

nahin dekhi ada-e-laghzish-e-mastana barson se

miri rindi ajab rindi miri masti ajab masti

ki sab TuuTe paḌe hain shisha o paimana barson se

hasinon par na rang aaya na phulon men bahar aa.i

nahin aaya jo lab par naghma-e-mastana barson se

khuli ankhon se huun husn-e-haqiqat dekhne vaala

hui lekin na taufiq-e-dar-e-but-ḳhana barson se

libas-e-zohad par phir kaash nazr-e-atish-e-sahba

kahan khoi hui hai jur.at-e-rindana barson se

jise lena ho aa kar us se ab dars-e-junun le le

suna hai hosh men hai ‘asghar’-e-divana barson se